立法會秘書處話，視乎下次會議情況，可能要加強保安Wo。
陳維安，上次迫人政治表忠單野，都未同你算帳，警告你唔好再陷立法會保安員於不義。
今次法案委員會會議，有一個前所未見嘅奇怪現象，就係無論個會開成點，會議場內幾亂，都唔見有保安執行主持命令，驅趕議員離場。
喺涂謹申召開嘅會議，固然係連擴音、秘書嘅支援都無，但即使係由石禮謙任主持嘅另一場，一樣無出現幾個保安夾手夾腳抬議員離場嘅場面。
梗係啦！就連前立法局主席黃宏發、前公務員事務局局長王永平，呢啲熟讀議事規程嘅重量級人物，都已經先後表態，話涂謹申嘅會議先係合法合憲，如果保安員走去聽從非法主持石禮謙嘅說話，驅逐任何一位議員離場，豈不是抵觸咗阻撓議員開會嘅法例，隨時要負上刑事責任？
第使如果有保安被告上法庭，可唔可以話係陳維安叫我咁做我先咁做，於是就唔駛承擔任何法律後果呢？大家都知係唔可能，「搵食啫」只係黃子華口中可以大晒，但從來唔係一個法庭接納嘅原因囉！
相反，「僱傭條例」卻有講，僱員只係有責任去履行僱主嘅「合法及合理命令」，唔去做呢啲極有可能抵觸法例嘅工作指令，根本就唔算違反工作守則。我地打工咋，唔通你叫我賣老翻、走水貨、作姦犯科，我都通通聽你講咩？
陳維安，請唔好迫啲保安員去做爛頭卒，如果你真係要加強保安，唔該自己下星期二親身上陣啦！