醫管局HR發信俾參與罷工員工，警告佢地話，員工喺工作時間內參加罷工無得到僱主同意，同埋員工參與罷工，只能根據法例規定去做。
原來又唔做嘢又唔書嘅人，唔單止死黑警，仲有醫管局HR。
幾千人規模罷工，作為HR，唔係應該諗下點樣拆彈點樣疏導架咩？反而仲要嚟火上加油、激化同事不滿？人地無返工但做緊好多嘢，守護香港人嘅健康同安全，喂你班友日日返緊工其實根本乜都無做lol。
你話員工「喺工作時間」罷工無經僱主同意，我想問下，有無人係喺「工作時間」以外罷工嘅呢？你咁叻不如你地嚟示範俾我睇睇？呢樣嘢根本係自相矛盾，同叫上帝創造一塊石頭去揼自己隻腳，有乜分別？
仲有你口口聲聲話，員工罷工無經過僱主同意，請問你有無見過世界上有罷工係得到僱主同意嘅呢？醫管局HR真係天才！人地員工發通知俾你，係表明唔返工因為履行罷工權利，而唔係請假、曠工或失縱，你咪當成人地同HR申請批准先得架！
再講，你話叫員工跟番法例去做，咁依家咪跟緊囉，除非你話《基本法》唔算法律啦！《基本法》第二十七條訂明：「香港居民享有⋯⋯組織和參加工會、罷工的權利和自由。」既然係基本法保障我地有權罷工，咁醫管局員工進行罷工，到底有邊方面無跟到香港法例呢？
相反，醫管局HR請聽清楚，如果你地針對罷工員工作出歧視同報復，你就真係絕對唔係「do so in compliance with the law」。