內容:
係之前嘅解說，我地都提及過，月薪員工因為合約形式關係，僱主不能單方面要求員工放取無薪假，即使強制左放假，僱員都會有追討薪金嘅權利（ 解說見此），但係一路無止境咁樣放落去都唔係辦法，月薪員工，可以有最後一著，可以拎返薪金及賠償，如果經濟真係有困難嘅朋友，要留意一下。
法例保障固定月薪制員工不能被僱主單方面放無薪假，如果僱主沒有按合約支付應付薪金，可被視為欠薪。而欠薪不但是刑事罪行，在欠薪長達出糧日後的一個月（例如，2月1日的應付薪金未付，等到3月1日都未出），僱員可以動用僱傭條例10A條，行使「欠薪引致的變相解僱」的權利，要求僱主支付遣散費、代通知金等賠償，而僱員在被強逼放無薪假期間的欠薪，僱主都需要一併支付，否則將會有刑責風險。
要特別留意，如果僱員曾經同意放取無薪假，就可能意味該段時間的僱傭合約條款已經在雙方接受下更改，未必可以行使此權利。
簡單而言，僱員要行使以上權利，需要符合以下條件︰
- 是為月薪制員工
- 沒有同意過僱主無薪假的安排
- 沒有應僱主要求主動申請過無薪假
- 被拖欠工資時間長達一個月
如果閣下符合上述條件，咁的確可以考慮行使以上權利，以上權利一方面可以保障僱員可以拒絕僱主嘅無薪假，令到僱員可以取得年資及薪金賠償，另覓工作，但另一方面，僱員就會失去原有工作崗位。大家要諗清諗楚先好用，亦都可以諮詢工會。
最後，保障大家最好嘅方法唔係法律，係團結！團結！團結！透過集合受影響既同事，一齊向資方提出訴求！
組工會最快攻略