一位Bauhaus前員工Chris話俾我地知，日前終於收到勞工處來電，話bauhaus願意賠番啲負鐘錢俾佢，現已取回被扣薪金。
不少曾聯絡我地嘅員工亦表示，已收到公司寫字樓電話，通知佢地下星期上去拎支票。如有被扣負鐘錢員工未收通知，可聯絡我地了解。
雖然員工嘅聲討行動終令資方作出讓步，但只限賠錢俾被扣薪嘅離職員工，對於現職員工而言，佢地仍然要孭住條負鐘數，被迫以無償OT還債。我地呼籲bauhaus現職員工齊集力量，全力抗對，要繼續向不公義說不！
今次Bauhaus負鐘扣薪事件，最初係因為員工集體轟炸Bauhaus嘅官方專頁，不斷留言控訴，並且tag埋職工盟，先至揭發原來咁大間上市公司都用呢啲嗱渣手段剝削員工。
前員工Chris係喺職工盟專頁出咗post ［Bauhaus焗員工每月負鐘尅扣薪金假期］之後pm我地，話自己去咗勞工處追討，喺調解會議資方代表不單拒絕賠償，仲老屈員工同意負鐘扣薪。佢同我地傾完之後，好主動咁聯絡咗10多位嚟自多間分店嘅前同事，又開設追數群組add人入去，鼓勵佢地要拎番自己啲血汗錢。
被問到點解咁落力幫同事，Chris話「如果個個怕麻煩，就會縱容咗啲無良老闆，唔係話幾多錢嘅問題，而係原則問題！」
Chris仲寄語同事們「希望大家日後都有呢份勇氣，如果唔係去到第二度又有機會比人壓搾。」
只要有人願意踏出第一步，將沉默打破，就係帶嚟改變嘅開始。我地出post揭發事件後，有大量市民留言關注，並表明以消費者身份抵制黑心企業，好多已離職及在職員工亦相繼pm我地，提供更多資訊，我地隨即出信俾勞工處要求部門執法（唔踢唔郁），並聯絡員工接受傳媒訪問。
我雖勢弱言輕，決不虛作無聲。呢個係過去一年香港人學到最重要嘅嘢，無論去到邊，我地都要繼續貫徹落去。
亦感謝香港黑警以及其他手足為員工發聲追擊，集結力量，對抗所有不公義。