（獨媒報導）政府於2019年4月1日起推出新的外判評分制度，增加工資所佔比例，以改善工人被剝削的情況。惟天水圍天晴邨清潔工的合約訂於新制推行前，令他們的月薪與其他屋邨的清潔工出現差距。天晴邨清潔工不滿同工不同酬，早前向房屋署遞交請願信，又發起聯署行動，以示抗議。
50多歲的清潔工容姐和詩姐，自2008年開邨便在天晴邨工作，一直辛勤盡責，今次毋懼秋後算賬，堅持出來發聲，只是想爭取應有的權益。她們批評外判商雅居漠視工友苦況，又斥房屋署推卸責任，要求盡快落實劃一工資和提供補貼，以及改善防疫裝備。元朗區議員郭文浩指，工人和工會將會於本月約見房屋署。
疫情期間工作量大增 「一磚一瓦我哋都要洗」
清潔工們昨日於天晴邨擺街站，收集街坊聯署及派發單張。不少街坊停下聆聽她們的現況，也願意簽署支持爭取同工同酬。
容姐是邨內60多名工友的「大家姐」，「每日要安排人手同工作，基本上咩都做，唔夠人就自己上。清潔唔係咁簡單，有好多繁複嘅嘢，例如垃圾機會壞，就要叫師傳去整。」詩姐則表示，每天早上6時半開工，下午休息幾個小時，晚上再開工，每日工作8小時。
在疫情下她們的工作量大增，容姐大嘆辛苦：「做到冇停，疫情之前一個月洗兩次樓，而家一個月四次，上個月晴雲（樓）就因為（有）確診洗咗四次，啱啱洗完都係要重新洗。」詩姐也指疫情期間的垃圾量多了一倍，「天晴邨一梯24伙，比其他邨多三倍人，平時一晚倒15桶（垃圾），而家最誇張有30桶。倒樓唔夠時間做，有啲工友自己下午返嚟做咗先。」除了洗樓和倒樓，整個屋邨範圍也要清潔，例如抹窗、升降機和遊樂場、打蠟等。「每一塊瓦每一塊磚頭，都係要我哋做。」容姐也會親身上陣做「dirty team」，清洗確診單位或有死者的單位，「驚啲細嘅唔敢去，都係自己去。」郭文浩也表示衞生署沒有調配人手處理，全都要工友自己做。
（左起）詩姐、元朗區議員郭文浩、容姐
工作量增加，也導致她們身體上出現勞損。詩姐指因步行太多而令大腿抽筋，而屋邨垃圾桶都比較高，令工友倒得很吃力，有時垃圾桶太滿就要彎腰撿起地上的垃圾，日積月累令全身痠痛不已。她笑言：「我哋阿姐買膠布比任何人都叻，膊頭貼兩張，膝頭又兩張，腰貼一張，五、六張一日，咁就冇咗五、六十蚊。」每逢大時大節時，垃圾也特別多，比平常要用多4小時倒垃圾，凌晨2時才能收工，容姐指有工友「執到坐喺後樓梯喊，喊完再做過」。她也表示有時要出動家人幫忙才能完成工作。
裝備不足仍緊守崗位 冀獲保護物資及勞損津貼
她們表示，疫情剛開始時並沒有任何裝備，只得每日一個口罩，詩姐說：「上次去房署嘈完先有4個口罩，其他邨都係得1至2個。其實口罩我哋都買得起，但係係一種關心囉，睇到對員工嘅態度係點，員工應該係公司資產嘛。」容姐也指防護衣太厚太焗，「未做都焗死，有啲人咪寧願唔著。」她們都希望可以有輕便透氣的保護衣。郭文浩指，這體現到房屋署無任何機制去補貼工友，「物資支援同勞損津貼係最基本保障，口罩呢啲應該唔使拗都有㗎嘛。」
即使裝備不足，她們依然緊守崗位，全因「責任」二字。容姐回想：「初時好驚，個個話有菌，冇人做，唔想傳染家人。」詩姐認為自己對工作有份執著，「係責任，拎咗份人工，就要比人做得更好，做好啲人哋就唔會染到病，咁自己都唔會染到。我唔做邊個嚟做呀？都係第二個上，人哋家人都會擔心。我做咗咁耐，知道點保護自己，如果新人咩都唔知仲易中招。」
月薪差距達3000元 「佛都有火」
然而，辛勤工作卻遭不公平對待，容姐和詩姐都很憤慨。詩姐指她們的合約由2019年4月1日至2022年，月薪為10,197元，同屬外判商雅居的天耀邨清潔工，在新制下月薪比她們多約3,000元。她們原以為外判商會調整，怎料只是根據房署機制加了270元，加完才僅僅過萬，外判商漠然推說是「合約問題」，叫他們找房屋署。詩姐感到不解又憤怒：「點解對啲員工咁樣？咁冇良知，佢哋賺十幾萬，幾千蚊對佢哋嚟講只係百分之幾，濕濕碎，對我哋嚟講個比例係三、四成，一年就少咗4萬。我哋冇要求多過人哋，係而家相差太遠。」她們質疑外判商「食水深」，大罵「佛都有火」。詩姐又批評房屋署推卸責任，完全不顧慮清潔工的苦況。
街坊情誼非金錢可衡量
在人情如紙薄的商業社會，工友們卻建立起深厚的情誼。詩姐指，外判公司經理曾對她說「呢度少錢咪轉去第二度囉」，但由開邨至今12年，工友之間以及和邨內街坊的關係，非金錢可以衡量。「我離鄉背井，同兄弟姐妹都冇咁親，我哋仲好過姐妹情，十幾年嚟日日見面傾偈，得閒又會幫手照顧小朋友，呢啲唔係錢嘅問題。」容姐也指曾想過走，「但係有班好姐妹，都係唔捨得。」
工友堅持發聲 要求房署劃一工資
她們都表示很想爭取到新舊約劃一工資，詩姐說：「我哋要求好低微，好多工友都自力更生，唔想拎綜援，唔想小朋友被標籤。而家物價、通脹咁高，出嚟幫補家計，政府應該鼓勵呢班人，政府負擔輕咗，我哋仔女又會開心，覺得媽咪好叻賺到錢，我哋只係想拎返自己應有嘅嘢。」
她們指，街坊經過工友街站，都會送上鼓勵，也會為她們感到忿忿不平。協助組織行動的郭文浩表示，希望有更多街坊關注和支持，也希望透過談判解決問題。他期望在10月內聯同工會和工友，以及區內其他屋邨面對同樣情況的工友，一起約見房屋署，要求他們回應工友的訴求。他也指有工友擔心被秋後算賬，但認為「工友只係講真相，而且佢哋企出嚟係幫埋其他舊約工人發聲，我哋都會齊上齊落，一齊開會一齊行動。」