九百蚊對好多人嚟講都唔係一個大數目，揾日下晝由荃灣搭車去黃埔拎張票，十幾蚊來回個幾鐘，都唔知有咩咁難做到。係咪？
但如果你無家可歸、傷患要覆診、之前仲「坐咗半年」，出嚟要搵工交租，經濟拮据，身上嘅錢夠返工唔夠收工。咁嘅情況下，九百蚊就好係嘢。我哋借錢俾佢有幾難，但佢想攞返自己打工嘅錢，希望公司通融下出糧方式，行個方便。
好難想像？但件事就係咁。應該唔駛額頭貼證明先明。
最後要釐清兩個事實。勞工組並唔係一嘢就踩上門，亦唔係冇向資方了解過件事。喺星期六朝早（10月24日），我地嘅義工已經致電豚道樂提出支票交收事宜，並且提出一啲建議可以點處理。但溝通不果。而十幾分鐘嘅電話入面，公司完全冇提過同合約有關嘅嘢，仲講到事主好煩，又堅持要事主下午3:30至5:00去黃埔分店親自簽收支票才出糧。多次要求通融不果，僱主講電話態度同出post態度好唔同，所以勞方先返荃灣舖頭開live攞糧，咁先肯即晚現金出糧。
既然講起，都可以講下過去我地見過嘅解決方法：由於金額上冇爭議，當面現兜兜，擺張支票喺分店，甚至係俾張支票一個雙方同意嘅中間人，就搞掂。其實真係可以好簡單。
＊＊＊
講完同件事直接相關嘅嘢之後，我地想再講我地對幾樣嘢嘅睇法。
搞好黃圈嘅勞資關係，有助黃圈走落去
由膳心事件開始，不時有人將我地嘅追討行動spin做鬥黃。完全係混淆視聽。直接追討早過黃圈出現，亦都唔會因為間舖係黃係藍而選擇追唔追。早在黃色經濟圈出現之前，我地已經搞緊直接追討。嗰陣當然冇咩藍店黃店之分。去到上年6月之後，街頭抗爭最如火如荼嘅時候，我地喺唔係發夢嘅日子，除咗搞十幾次「黑警暴行錄」街頭放映之外，一樣抽時間同遇到問題嘅打工仔踩上門。嗰陣黃色經濟圈先啱啱成形。
如果唔清楚我地之前搞過啲乜，可以睇下以下追討行動：
趁佢病、炒咗佢 大埔浸信會苛待工傷社工
一時停薪留職一時話解僱 MOS Burger涉病假期間炒副店長
長沙灣和你追 速遞手足上門追糧
富臨解僱唔賠錢 長沙灣街站
追返嚿錢唔係靠勞工處係靠呢班義氣手足幫拖
香港嘅勞工待遇實在太差，勞資雙方嘅權益意識普遍都好薄弱，好多習非成是嘅做法會被認為理所當然。黃店有呢類問題完全唔出奇。既然有問題，就要改，而唔係打算用一句「唔好鬥黃」嚟解決提出問題嘅人。啱啱相反，作為黃圈嘅消費者，你更加應該留意你洗嘅錢係咪用得其所，係咪令社會變得更好。否則黃圈就唔係黃圈，同普通嘅飲食指南冇分別。
另一種附帶嘅spin，就係講到我地嘅要求難過登天好唔合理要做就做唔成生意，一睇仲以為係張宇人講。大佬我地宜家唔係叫你加一倍人工，係要求按返《僱傭條例》設下嘅低到冇得再低嘅底線嚟做嘢咋。呢個標準已經超低，黃唔黃都必須做到。咁都覺得唔合理嘅話我就會問對你嚟講「撐手足」究竟係咩意思。不如開個價睇下？
如果黃店keep住有勞資糾紛，其實會令抗爭聲譽受損，令去打工同幫襯嘅人失望，件事就無以為繼。黃色經濟圈唔係淨係有黃店。仲有去黃店打工嘅人，同埋幫襯黃店嘅人。呢個圈點解會組成，係因為大家認同抗爭，認為黃圈係一個有效嘅抗爭方式，令各種抗爭者互惠互利。而搞好黃店工人權利，係搞好互惠互利必不可少嘅一環。如果你係黃店持份者而希望喺呢方面作出改善，我地樂於提供意見。
我地有冇「幫錯人」？
年中不時有人會指責出嚟追討嘅事主本人「都有問題」，「唔抵幫」，甚至post啲關於事主嘅流言出嚟。然後下一句就會質疑我地「幫錯人」。我地要強調，我地唔會考慮個事主係唔係一個合乎所有「完美受害人」嘅條件嘅人。只要佢肯追討，我地就會同行。權益還權益。工作表現還工作表現。私德還私德。模範員工無故被炒可能比較會得到同情，但一個做得差又人緣唔好嘅員工，一樣有佢應得嘅權利。
好多人淨係幫老闆搵理由，從來唔肯幫打工仔搵理由
成件事最令我地忿忿不平嘅係，好多人平時口口聲聲話撐手足，去到手足有事就完全唔理手足難處，講到完全係佢個人有問題。好多人幫老闆諗理由，責怪手足唔體諒唔配合公司，得幾個會肯了解手足嘅處境。
搞大佢都唔係為咗解決件事！
尋日個義工下個月就結婚，忙到雞毛鴨血，但因為事主急，就即刻一齊去追。為乜？
好多嘢其實一個電話就解決到，你估我地好得閒咩？包括今次在內，絕大部份個案我地都會先聯絡資方，聽一次對方講法，提出我地嘅睇法同埋建議點解決。溝通無果先會直接上門或網上聲討。大部份情況下，打幾個電話，甚至聲都唔駛聽，只係電郵來往，件事就解決到。呢種大家見唔到就完咗嘅個案，係大家喺呢個page見到嘅公開追討嘅十倍有多。
快手搞掂係好呀，但唔得，就唯有再進一步行動囉。正如我地一直講，勞工處反應慢，效率低，最弊係唔會企喺打工仔嗰邊。經過過去幾年嘅實踐，我地越嚟越發覺，由打工仔直接上門，同佢嘅（前）老闆、（前）同事，甚至公司嘅顧客或其他持份者對話，係最有效嘅方法。由事主自己追討自己嘅權利，唔駛依賴嗰啲玩鳩佢嘅政府程序。我地就一直協助、陪伴、同行。有啲時候，事主幾乎唔駛我地「幫」，自己已經準備晒所有嘢，我地只需幫佢post，或提供少少意見，講下條例細節之類。
喺香港，呢種做法最常見就係地盤工友被拖糧，封地盤半日就拎返錢嗰種，一年起碼有十幾廿單。但除咗地盤工友之外，各行各業嘅人都可以咁做。只係少見，但唔奇怪。
再重申一次，我地真係唔係中間人嚟。我地同出嚟追討嘅事主企埋一齊。視乎事主嘅意願同需要，有時做多啲，有時做少啲。但幾時都係勞方。
任何嘢都係唔抗爭就唔會有
經過超過一年嘅時代革命，大家一定明白，抗爭唔一定成功，但唔抗爭就乜都唔會拎到。大家亦肯定體會到，要企出嚟行動並唔容易，總有風險。就好似我地今年好多單追討都俾黑警滋擾。可能你覺得勞資關係應該和諧，唔應該搞到決鬥咁。又或者你自己同公司有商有量，唔明點解事主要搞到咁。但你同公司關係好真係只能夠話係你好彩，實情就係好多人唔係。亦有好多事主本身就係最希望勞資和諧嗰個——直至佢自己瀨嘢，先覺得唔可以再客氣。
如果你對於藍屍廢老話你搞事反感，當你覺得追糧嘅人搞事嘅時候，就真係要諗諗係咪自相矛盾。
齊上齊落，即係點？
可以肯定，好似事主嘅狀況嘅手足絕對唔止佢一個。過去一年，大家身心都受到唔同程度嘅創傷。全港二百萬手足，個個唔同，互相可能好難想像或理解各自咩處境。但如果講到齊上齊落，齊上，我地都喺街頭努力咗一年，做咗喇。齊落，宜家街頭抗爭沉寂，「手足」變返一個一個單獨嘅個人，難以相認；去到知道手足需要嘅時候，我地真係準備好撐住佢地未？好難做。一齊做。
最後再一次多謝勇於追討嘅事主同義工，以及一眾網友關注。