小賓做左管理處咁多年，好多時都會聽到啲客疑問，年年都加管理費，咁做管理員都幾好搵喎！人工加得咁密！又或者，當小賓同法團委員開會傾屋苑預算要加管理費時，佢地既反應通常係：
委員A: 「哦, 即係每戶比多二三十蚊啫, OK啦!」
委員B:「唔係喎, 其實我真係唔明白, 點解年年都要加管理費呢? 唔好講咩維修喇, 你地憑乜野成日加人工先? 經理我唔係話你呀, 我講D保安呀, 年年都加, 人工就黎好過我喇!」
事實又係咪咁呢？
當我提出既係増加管理費, 大家似乎都只係討論緊管理員既工資。但係, 加管理費並唔代表增加保安員既人工架。保安員既人工, 其實係根據佢地各自同管理公司簽訂既合約而決定, 而唔係根據屋苑收入而決定架。根據大部分管理公司同屋苑簽訂既合約, 管理公司只會當法定最低工資提高既時候, 先會同法團相討增加行政費, 調整保安員既薪金以符合法例。亦即係按現今制度, 每兩年先有一次調整既可能, 並唔係每次加管理費佢地都有人工加架。
既然人工冇加到, 咁管理費加黎做乜呢? 我諗大家都知道, 其實一棟大廈係包括好多野架, 例如清潔、升降機、保安系統、消防系統、發電機、園藝、天線接收、供水系統、各類維修工程等等, 每一樣野其實都要交保養費, 而保養商亦會按每年通脹增加保養費, 亦即係屋苑每年支出都會增加, 而大家經過大堂走廊既一磚一瓦, 亦即係我地俗稱既公家地方, 都要用管理費維修架!