內容:
自由標籤:
坦白講，我對公投結果係唔樂觀。公投門檻係好高，今次要六萬人參與，一聽到就知道個門檻好高，唔容易達到。但係，要諗下一場罷工無返咁上下多嘅人參與，政府根本無壓力。所以，可能明知好困難，甚至，明知今次做唔到，我都希望係同大家認真去做，起碼，可以比其他手足睇到，其實有人仲未放棄，有人繼續做，而且好認真咁。希望從中大家可以得到鼓勵，大家一齊繼續行落去。
我們地盤佬，成日話要「死砌爛做襟得屌」、「耷低頭無要求」。但係出面個社會咁樣、政府咁樣，香港墜落左，對我地無影響咩？
眼見過去十年，香港社會環境變得越來越唔同，再加埋國安法，令我覺得香港更加唔係以前嘅香港，大家選我做工會理事，我好希望係工會裡面，同大家一齊做啲野，所以工會參加呢個公投。
大家地盤佬都知，地盤大判好多都係紅色資本，又眼見有啲細公司無啦啦上左市，又見啲政協入市，有啲野，大家都感覺得到。啲工程最後判埋判埋，工程費都係比曬紅色資本。我地成日話，做地盤「十年餓撚死，十年飽撚死」，餓撚死嗰陣，無人理我地，到有得飽嗰陣，又話唔夠人要搵外勞，根本唔輪到你食。邊個理我地？問題係邊度？
問題就係個掣度，大家係唔係永遠默默咁忍受？我明嘅，有啲野無辦法都要低頭，做地盤都係為養頭家，好多野都明，我公司都逼我簽支持国安法啦，但依加有方法，係喺安全情況下做得到嘅，希望大家都出手去做。
地盤佬、建築地盤職工總會 ｜ 安巴
#620罷工公投 #職工盟反国安法意向投票
熱線：27708668
FB Inbox: 職工盟(HKCTU)
TG:@HKCTU