失業率升至6.2%，破15年來最高位，失業人士增加到24萬人，眼見失業問題愈嚟愈惡化，政府仍然鐵石心腸，死都唔肯搞失業援助金。
勞福局局長羅致光早前曾公開表示，話設立母須經濟審查嘅失業援助金係過份樂觀。計我話，你仲期望個政府有番少少人性都真係已經過份樂觀咗。敢問羅致光局長，點解政府可以豪花超過800億推保就業計劃，申請嘅企業不論賺蝕，唔駛審查，通通可獲政府補貼，咁樣唔係雙重標準係咩？
財團企業隨時拎政府補貼一千幾百萬，有啲甚至去到億億聲，但對於果啲彷徨無助嘅失業工人，政府就要用最嚴苛嘅「失業綜援」去查你家宅，唔單止要審查所有個人資產，仲連你供開果份保險單都唔會放過。
眼見疫情急速反彈，失業情況短期內都好難好轉，要搵工做難過登天，政府再唔盡快搞失業授助金，等同睇住工人跌落懸崖深淵，政府就翹埋雙手見死不救。
對財團老闆可以慷慨解囊，對失業工人就刻薄成性，聽到呢個政府再講乜乜關顧弱勢乜乜心繫基層，真係難聽個粗口！
版權: